Björgólfur - Björgrófur

Mér er hreinlega hætt að koma nokkur skapaður hlutur á óvart.  Næst fréttir maður eflaust að einhver hafi selt skuldabréf til að standa straum af útför ömmu sinnar, - ef þá ekki bara hreinlega selt af henni skrokkinn, eins og  í sögunni um Stóra-Kláus...

Menn sem nota að yfirvarpi einhvern minningarsjóð um látna dóttur til að koma út skuldabréfi upp á litlar 400 kúlur, það sýnir svo takmarkalausa siðblindu að orð fá ekki lýst.

Gaman væri að sjá bókhald þessa minningarsjóð !  Ef það er til.

Vísað til efnahagsbrotadeildar

Afturhaldsmaðurinn Jón Bjarnason

Kæri Jón !

Það getur meira en satt verið að það sé ekki tímabært að vera umsækjandi um EB-aðild einmitt núna.  En þú veist vel, rétt eins og ég, að það er enginn vafi á því að Ísland verður aðili að Evrópusambandinu, fyrr eða síðar.  Ástæðan er einfaldlega sú, að við sem búum hér, ætlum Íslandi að verða nútímalegt velferðarríki, í nánu samstarfi við umheiminn og okkar nánustu viðskiptaþjóðir og í góðum tengslum við þann hluta heimsins sem er okkur líkastur í menningu og hugsunarháttum.

Við hverfum ekki til baka 40 ár, eins og mér finnst vera draumur margra þinna flokksbræðra.  Einangruð frá umheiminum, í samfélagi þar sem frumvinnslugreinarnar hirðingjabúskapur eru í forgangi, rétt eins og í þróunarlöndunum svokölluðu. 

Evrópusambandið og aðild að því mun gerbreyta valdahlutföllum á Íslandi.  Í stað þeirrar "nýlendustefnu" sem hefur viðgengist hér innanlands munu einstök svæði landsins geta leitað samstarfs og fjármuna nánast hvert sem er innan Evrópu.  Ekki bara til Reykjavíkur.  Það mun draga úr völdum ríkisvaldsins hér innanlands, og það er vel.  

ESB-umsóknin þungbær

Þörf áminning

Ég gleðst í hvert skipti sem ég heyri um að blásið er til sóknar gegn einelti.  Þessum skugga sem fylgir mörgum langt fram eftir ævi - og jafnvel ævilangt.  Það eru svo margir einstaklingar sem bera þess sár að hafa þolað þá niðurlægingu að vera meira eða minna útskúfað úr félagsskap skólafélaga sinna.  Margir sem þurftu að þola einelti tóku þátt í því sjálfir líka, til að reyna að kaupa sjálfum sér frið eða hylli félaganna.

Sjálfur á ég minningar um óttann, sorgina og vonbrigðin sem þessu fylgdu.  Sjálfur mátti ég horfa upp á aðfarir gegn öðrum sem ekki er segjandi frá, þar sem ég þorði ekki annað en að láta sem ekkert væri, til að dragast ekki inn í það sem ég óttaðist mest.  Grimmdin, miskunnarleysið og skeytingarleysið gagnvart öllu sem viðkomandi var mest virði gat verið ólýsanleg.  Sumir brotnuðu, meðan aðrir brynjuðu sig með skel hörkunnar.  Í báðum tilfellum var afleiðingin félagsleg einangrun.

Átaki gegn einelti hrint úr vör

Nú er komið nóg

Það er óhæfa ef ríkisstjórnin ætlar að hunsa vilja Alþingis og þar með lýðræðið í landinu með því að koma eina ferðina enn með þetta mál þangað inn.  Við viljum þetta ekki og þar við á að sitja.

Icesave-fyrirvörum breytt

Manni ógnað með "exi"

Hvernig lítur exi út ?  Var það ekki öxi sem þessi þjófur var með ?

Ógnaði öryggisverði með exi

Enn verið að kenna Kárahnjúkavirkjun um

Furðulegur málflutningur !

Ef málið er skoðað, þá var virkjunin og álverið á Reyðarfirði byggt fyrir erlent fé, unnið að mestu af erlendum starfsmönnum og aðföngin að langmestu leyti erlendis frá.  Þensluáhrifin voru því tæpast meiri en ef t.d. íslenskur verktaki hefði verið að byggja þessi sömu mannvirki í öðru landi og notað þarlent fjármagn, vinnuafl og aðföng.

Hver skyldi heildar fjárfesting í atvinnu- og íbúðarhúsnæði á höfuðborgarsvæðinu á sama tíma kostað í samanburði við þessa einu virkjun?  Þar var vissulega mikið af erlendu vinnuafli, en samfélagslegu áhrifin voru mun meiri.  

Stjórnvöld héldu einfaldlega uppi alrangri peningastefnu.  Auðvitað átti að láta gengið síga og hækka skatta strax árið 2005 og bremsa bóluna sem var í uppsiglingu. Þetta er ekki í fyrsta skiptið sem hagkerfi fer inn í svona spíral, eins og gerðist hér.  Hvar voru fræðingarnir og pólitíkusarnir ? Er það ekki nægjanlegt hættumerki þegar viðskiptahallinn við útlönd nemur tugum eða hundruðum milljarða á ári hverju ?

Það eru Sjálfstæðismenn sem bera höfuðábyrgð á því hvernig fór.  Sjálfstæðismenn í fleiri flokkum en Sjálfstæðisflokknum.  Það er komið berlega í ljós hvílíkt öfugmæli nafn þessa illræmda flokks.  Hann þarf að einangra í pólitík um ókomin ár.  Eflaust ekki hægt að uppræta hann eins og illgresi í garði, en það verður að halda þessum græðgis- og eyðingaröflum í skefjum.  Þessu fólki sem lítur á samfélagið sem veiðilendur, þar sem enginn kvóti gildir.

Hvers vegna? Hvað svo?

Hættið þessu bara

Er ekki bara best í stöðunni að láta þetta liggja eins og það er ?  Þá verður tryggingarinnistæðu-sjóðurinn gjaldþrota á næstunni og kröfuhafar verða að sækja sín mál fyrir dómstólum á Íslandi. Það er væntanlega eina leiðin til að komast að því hvort okkur beri lagaleg skylda til að leggjast undir drápsfargið.

Sagt var að til að taka erlend lán þyrfti maður að hafa tekjur í erlendri mynt.  Hversu stór hluti tekna ríkissjóðs er í erlendri mynt ?  Hvernig hugsa menn sér að ríkið borgi niður hundraða milljarða erlendar skuldir og hafi um leið skaplegt lánshæfismat ?  Ég skil það ekki og ég held að ég sé ekki einn um það.

Ekki séð fyrir enda Icesave

"Nýi sáttmáli" ? NEI TAKK !

Það fer hrollur um mig þegar ég les þessa frétt um norsk-íslenskt bandalag.  Noregur er vissulega fallegt land og þar er margt ágætis fólk - en að ganga í bandalag með Noregi sem eins konar mótleik gegn Evrópusambandinu er fáránleg hugmynd.

Ég bjó nógu lengi í Noregi til þess að kynnast því hvernig það samfélag er. Það er alls ekki alslæmt, en það er - hvað á ég að segja - afar ó-íslenskt.  Hafi einhverjum þótt ýmsir hlutir í okkar kerfi hér heima ferkantaðir, þá tekur nú steininn úr þegar kemur til Noregs.

Menn skulu athuga það að Noregur er eitt af fáum löndum Evrópu, ef ekki það eina, sem heldur uppi landakröfum.  Noregur hefur gegnum tíðina rekið utanríkispólitík sem beinist að því að auka norsk áhrif og jafnvel að vinna önnur lönd undir sig.  Á sínum tíma reyndu þeir að leggja Austur Grænland undir sig, en voru gerðir afturreka.  Hins vegar náðu þeir Jan Mayen, sem hafði þó verð að nokkru nýtt frá Íslandi áður.  Hver man ekki æsinginn í þeim út af Smuguveiðunum, sem þó er alþjóðlegt hafsvæði. Nú predika þeir að Svalbarði sé hluti af Noregi, þó svo sé ekki.  

Noregur grár fyrir járnum.  Herinn hefur sterka stöðu og Norðmenn blása stöðugt í glóðir niðurlægingar sinnar frá stríðsárunum.  Stórveldisdraumar þeirra eru alls ekki dauðir, né heldur sú kynþáttahyggja sem ekki er talin í húsum hæf víðast hvar í Vestur-Evrópu. Það var raunalegt að upplifa það sem innflytjandi í Noregi að heyra hvernig jafnvel vel menntað og upplýst fólk þar talaði um innflytjendur af erlendum uppruna í landinu, ekki síst ef þeir aðhylltust önnur trúarbrögð en fjöldinn eða hafði annan húðlit.

Ég á marga vini í Noregi og það er allt ágætisfólk.  En rétt eins og við Íslendingar sem höfum fengið græðgina í arf frá "vertíðarmennsku" og skyndi-hergróða, þá eiga Norðmenn annan arf sem ég held að best sé að þeir séu einir um.  Noregur er nú einusinni stærsta eyja Evrópu !

Ísland og Noregur myndi með sér bandalag

Undarlegt mál

Í venjulegu árferði er eflaust eðlilegt að hafa trúnað um eigna- lána- og skuldastöðu einstakra fyrirtækja af samkeppnisástæðum.  En nú horfir öðruvísi við:  Skýrslan er þegar öllum aðgengileg og hver sem er getur komist yfir hana, hvernig sem hún lak út á veraldarvefinn.  Það er heldur ekkert venjulegt árferði í landinu núna.

Það er því all merkilegt að fjölmiðlum sé óheimilt að fjalla um hana, þ.e. einum fjölmiðli, nefnilega RÚV.

Það er deginum ljósara að athafnir stjórnenda bankanna allt árið 2008 og trúlega lengur hafa ekki verið til þess fallnar að öllu leyti að verja hagsmuni bankanna sjálfra.  Ella hefðu þeir varla fallið hver af öðrum eins og spilaborgir. Það hefur verið gefið í skyn hvað eftir annað að bankarnir hafi verið notaðir til að koma fjármunum ýmissa aðila, tengdra og ótengdra, út úr íslensku fjármálakerfi, til síðari nota.  Hvað hæft er í því á eftir að  koma í ljós.  Stóru orðin bíða því enn um sinn og er það miður. Kannski á eitthvað eftir að koma í ljós við persónuleg gjaldþrotaskipti eins eigenda Landsbankans, sem gæti kastað ljósi á atburðarásina.  Hver veit ?

Kaupþing fékk lögbann á RÚV

Öldruðum safnað í blokkir. Svei !

Auðmenn eða ekki auðmenn.  Alltaf þegar ég sé eða heyri um það að byggðar séu blokkir fyrir gamalt fólk, þá fer hrollur um mig.  Hvers vegna í ósköpunum er ekki hægt að byggja húsnæði fyrir gamalt fólk á einni hæð, þannig að íbúarnir eigi þess kost að finna þó ekki væri nema örfáir fermetrar af grasi undir iljum sínum utan við húsdyrnar ?  Ég hef sjálfur horft upp á hreinan harmleik gamalla hjóna sem fluttu úr sveitinni í blokk.  Þau höfðu ekki haft annað ónæði um ævina en að heyra spóann vella á vorin.  En nú urðu þau svefnlaus af umgangi ókunnugs fólks og umferð af ýmsu tagi.

Það er nóg landrými bæði á Húsavík og annars staðar á landinu til að byggja hverfi smærri húsa, raðhúsa eða parhúsa fyrir fólk sem flest hefur eytt ævinni á jarðhæð eða í mesta lagi á 2. hæð.  Mig grunar að það sé ekki velferð íbúanna sem ræður þessari blokkadellu, heldur hagræðing fyrir þá sem eiga að sinna gamla fólkinu.

Þjónustuíbúðir verði auðmannafangelsi