Góðar fréttir

Tvöfalt góðar fréttir.  Til hamingju Héraðsverk !  Og til hamingju allir Austlendingar !  Þetta er fyrsti áfanginn í því að gera Hringveginn þannig úr garði að mannsæmandi sé.  Svo kemur nýji vegurinn um Öxi og styttir Hringveginn um 61 km.  Munar um minna. 

Það gleymist ef til vill að vegur um Skriðdal og Öxi er ekki bara hagræði fyrir Héraðsbúa. Staðreyndin er sú að fyrir Reyðfirðinga, Eskfirðinga og Norðfirðinga er styttra að fara um Skriðdal og Öxi suður á land en um Suðurfirði, þrátt fyrir Fáskrúðsfjarðargöng.  Eftir nokkur ár verður komið bundið slitlag á alla þessa leið og þá verður vonandi líka búið að laga veginn í Hamarsfirðinum.

 

Buðu lægst í veg um Skriðdal

Tónlistarhöllin: STOPP

Nú er ég alveg sammála Pétri Blöndal og fleirum.  Mér finnst ekki koma til mála að halda áfram byggingu á "Musteri græðginnar" - Tónlistarhöllinni.

Það fer vel á því að þetta bákn standi á komandi árum sem minnisvarði um græðgisæðið og bruðlið og til daglegrar áminningar um það sem varast ber.

Fá mannvirki hafa rækilegar undirstrikað að í landinu búa að minsta kosti tvær þjóðir, allavega hvað lífskjör og allar viðmiðanir varðar. Víst átti þetta að verða glæsileg bygging, en hugsið ykkur:  Enn er ekki einusinni búið að koma öllum byggðum landsins í vegasamband, hvað þá meira.  Enn er meira að segja Þjóðvegur númer eitt ekki að öllu leyti kominn upp úr forinni.  Ástandið á elstu þjóðvegunum með bundnu slitlagi er þannig að þeir eru að þrotum komnir.

Fleiri góð mál sem varða hag alls almennings mætti nefna sem eru margfalt brýnni og örugglega jafn atvinnuskapandi og gott betur en þetta skrímsli í Reykjavík.

Deilt um tónlistarhús á þingi

Allt er afstætt

Það er alveg magnað hvað fjölmiðlar okkar eru takmarkaðir við suður- og suðvesturlandið. Nú linnir ekki fréttum af góða veðrinu, en ekkert var sagt frá blíðunni  sem var um allt norðan- og austanvert landið, - alveg þangað til fyrir þremur dögum síðan.  Þá var hér sól og blíða.  Nú er kuldi, þokuruðningur og súld hérna megin.  Það er svo kalt í dag að maður fer ekki út án þess að fara í vetrarfötin.

Ef kólnar örlítið meira fer að snjóa í fjöll á nýjan leik.

En ég samgleðst ykkur sunnanmönum fyrir þessa daga, en vona samt að rokið og rigningin komi til ykkar sem fyrst, því þá er sumar og blíða hérna hjá okkur 

Útlitið bjart næstu daga

Cliff Richard vann Eurovision !

Sæt blanda af Sir Cliff Richard og norskri bjálkakofamúsík var það sem til þurfti.  Norðmenn fá örugglega þjóðernisrembufullnægingu á  morgun, enda ekki minni dagur en 17. maí.

Nú þurfa Íslendingar að þurrka rykið af langspilinu og fá lánaðan einhvern gamlan og þekktan sykurpúða frá sjötta áratugnum næsta ár og sjóða kokteil sem dugir.  Bara að tónlistarhöllin í Rekavík verði tilbúin fyrir stóra ballið.

Ísland í 2. sæti í Moskvu

Þingmenn samtímis ráðherradómi ?

Nú væri gaman að vita hvort þeir þingmenn sem eiga að gegna ráðherraembætti hugsa sér að kalla inn varamenn á þingið í sinn stað, eða hvort halda á áfram uppteknum hætti, þ.e. að blanda saman löggjafar- og framkvæmdavaldi.

Þetta er eitt þeirra atriða sem gagnrýnt hefur verið sem þáttur í lýðræðisleysi á Íslandi - og þykir óhæfa á hinum Norðurlöndunum.  

 

Óbreytt stjórnskipan

Ögmundur verður seint diplómat

Með niðurlagsorðum sínum staðfesti Ögmundur önugur það sem allir máttu vita.  Hann er ekki kandidat fyrir sendiherrastöðu.  Svona orð úr munni ráðherra eru ekki mjög fyndin, enda er ráðherrann ekki mikill húmoristi og brosir mjög í hófi. Raunar er bara ekki sniðugt í þeirri stöðu sem við erum að fara fram með gífuryrði og sleggjudóma.

Heimslögregla kapítalismans

Drekasvæði og samfélagsuppbygging

Það er alveg rétt sem bent hefur verið á, að hvorki álver og virkjun né drekasvæðisævintýri sé sjálfkrafa ávísun á samfélagsuppbyggingu.  Sé þessu snúið við, þá er líka ljóst að samfélagsuppbygging verður ekki til án þess að framleiðsla og efnisleg verðmætasköpun sé með í myndinni.

Stærsti óvinur allra byggða utan Faxaflóasvæðisins er skortur á fjölbreytni í atvinnulífi og menntunarstig, ásamt misgóðum samgöngum.  Því fer fjarri að aðstæður frá náttúrunnar hendi hamli uppbyggingu sjálfbærra og þróttmikilla samfélaga utan höfuðborgarsvæðisins. Það er vítahringur fámennis, lágs menntunarstigs, lélegrar þjónustu og ekki síst:  Veikrar sjálfsímyndar.  

Það sem vantaði á Austurlandi var ekki bara álver og stór virkjun.  Það vantaði allt hitt líka.  Betri samgöngur, meiri þjónusta á öllum sviðum, mennta- og rannsóknarstarfsemi o.s.frv.  Ef þú biður kokkinn um að sjóða súpu fyrir 100 manns í stað 10, þá er ekki nóg fyrir hann að fá bara eitt af hráefnunum: Nei, kokkurinn þarf að fá meira af öllu því sem þarf í súpuna. En einkum og sér í lagi þurfa þeim sem fá súpuna á diskinn að þykja hún góð.

Norðausturland er í dag afskipt í samgöngum. Miklar fjarlægðir milli fámennra staða.  Enn er ekki búið að  ljúka við veginn yfir Melrakkasléttu.  Enn er ekki búið að gera jarðgöng milli Vopnafjarðar og Héraðs.  Enn er ekki kominn heilsársvegur um Öxi, hvorki á yfirborðinu eða um jarðgöng.  Norðausturland er landsvæði mikilla tækifæra og ekki er vafi á því að þess tími kemur.  Það er hins vegar hæpið að ætla að öll litlu byggðarlögin á þessu víðfeðma svæði muni lifa til frambúðar.  Jafnvel þótt olíuhreinsunarstöð eða þjónusta við olíuiðnað komi til.  Fólk sest einfaldlega helst að þar sem fjölbreytt þjónusta er fyrir hendi.  Vel kann að vera að Húsavík muni dafna í framtíðinni og að þar verði samfélag með nægu framboði af atvinnu fyrir konur og karla og lokkar heim unga og vel menntaða fólkið sem núna sest að annars staðar.  Það sem helst vinnur gegn því er nálægðin við Akureyri, sem hefur feikna forskot í samkeppninni um fólk.  Á Austurlandi er enginn stór byggðakjarni, en sá stærsti og sá sem í dag býður upp á mesta fjölbreytni í atvinnulífi á e.t.v. möguleika, vegna landfræðilegrar legu og annarra aðstæðna sem unnt er að styrkja.

Íbúum fjölgi með olíunni