Háttvirt og hæstvirt. Nú um sinn einungis virt - til jafns við aðra

Ágætu frambjóðendur, hvar í flokki þið standið!

Það eru litlar líkur til að þið lesið þessar línur, en engu að síður vel ég að tala í tómið, ef svo ber undir. Mér hefur verið hugleikinn sá samskiptamáti sem tíðkast jafnan þegar líður að kosningum.  Fyrir hinn almenna kjósanda er það eins og að koma í búð, þar sem einungis eru boðnar fjórar (eða sjö) vörutegundir. Þar standa fulltrúar þessa varnings og mæla allan kost á sinni vöru og löst á vöru hins næsta.  Við sem komum í þessa búð eigum þess kost að kaupa eitt stykki, eða ganga út og kaupa ekki neitt.  Ef við höfum keypt eitthvað, þá er fráleitt að vita hvernig varan muni reynast, því það kemur ekki í ljós fyrr en búðinni hefur verið lokað í allt að fjögur ár.

Hvernig væri að þið íhuguðuð með mér aðra nálgun á þessum "verslunarrekstri" ?

Þið eruð frambjóðendur, umboðslaus um sinn til að vera fulltrúar mínir eða annarra landsmanna.  Hvorki hæstvirt né háttvirt.  Bara virt.  Jafnt við annað fólk sem á virðingu skilið, nema annað sé verðskuldað.  Mitt er að tala og spyrja.  Ykkar er að hlusta og svara.  Mitt er að meta það hverju ykkar ég treysti best til að vera minn fulltrúi.  Því betur sem þið hlustið, þeim mun betur mun ég treysta ykkur.  Af svörum ykkar mun ég meta ykkur.  Ekki af auglýsingum ykkar og öðru skrumi, þar sem þið berið lof á ykkur sjálf og ykkar stefnu eða flokk.  Ef þið komið fram sem vörukynningarfólk í búð sem býður fram einhverja tiltekna vöru fyllist ég tortryggni. Ef þið leggið eyru við því sem ég og aðrir kjósendur segjum við ykkur og gefið ykkur tíma til að hlusta, þá eruð þið á réttri braut.  Vegna þess að þið eruð umboðsmenn annarra.  Valdið sem ykkur er falið kemur ekki frá ykkur sjálfum, heldur hafið þið það að láni frá öðrum.  Við kjósendur spyrjum ykkur spurninga, og ef þið svarið af skynsemi og virðingu fyrir spyrjandanum, án undanbragða og málskrúðs, þá uppskerið þið traust.

Við sitjum enn um sinn í viðjum flokksræðisins.  Meðan það er við lýði verður vöruúrvalið í "búðinni" fátæklegt.  Pakkað inn í fjóra eða sjö böggla sem við vitum ekki hvað innihalda.  Þegar við verðum búin að gera flokksræðið óvirkt og lýðræðið virkt, þá munið þið hlusta.  Ef til vill munum við kjósendur sjálfir hafa frumkvæði að því að finna fulltrúa meðal okkar sem ekki hefur neina gamla flokksstofnun á bak við sig, til að fara með umboð okkar.  Sá fulltrúi mun spyrja okkur hin álits um málin áður en atkvæði er greitt, ekki flokksforingjann eins og nú er.

Með kærri lýðræðiskveðju,

 ÞP

Athugasemdir

[Jack Daniel's, 19.4.2009 kl. 11:09]

Tek undir þetta með þér og bendi á pistil sem ég ritaði til frambjóðenda í morgunn til að minna þá á hlutverk þeirra.

[Hilmar Gunnlaugsson, 20.4.2009 kl. 15:32]

Það er ólíklegt að frambjóðendur lesi þetta eins og þú segir og því ráðlegg ég þér fremur að fara inn á althingi.is og finna netföng stjórnmálamanna. Svo geturðu sent bréfið á þá.