Öxi verður að laga sem fyrst

Þessi frétt sýnir glögglega að það er kominn tími á þessa styttingu Hringvegarins um 61 km.  Það er búið að hanna nýjan veg um Öxi og þegar hann verður kominn verður þetta ekkert mál.

Erlendir ferðamenn skoða oft vegakort og fara eftir því.  Og vitanlega blasir við á korti að þetta er leiðin milli Suðausturlands og Miðausturlands.  Ef vegir eiga að vera lokaðir þarf að merkja þá með merki sem allir ökumenn þekkja, kringlótt skilti með rauðum hring, fylltum með gulum lit.


mbl.is Ferðamenn festu sig á Öxi
Tilkynna um óviðeigandi tengingu við frétt

Ögurstundin nálgast

Enn er von.  Verði Icesave-frumvarpið fellt í kvöld kemur upp sú stða sem Pétur Blöndal lýsti í Kastljósi Sjónvarpsins í gær.  Þá er bara að vona að Bretar og Hollendingar lýsi því yfir að þeir sætti sig ekki við niðurstöðu Alþingis frá í ágúst sl. og að málið fari fyrir íslenska dómstóla.  Versta niðurstaðan úr því yrði aldrei verri en það sem ríkisstjórnin er nú að þvinga í gegn.

Eflaust hangir fleira á spýtunni.  Vera kann að með dómsmáli um Icesave fari draumar Samfylkingarinnar um Evrópusambandsaðild út í veður og vind.  Um sinn.  Og þó ég sé eindreginn stuðningsmaður aðildar að Evrópusambandinu, þá vil ég ekki að hún verði of dýru verði keypt.  Ekki heldur vil ég horfa upp á Ísland fara þar inn skottið milli fóta og allt í óreiðu í okkar málum. Evrópusambandaðild á eftir að koma, jafnvel þó við deilum um það mál jafn lengi og við deildum um það hvort drekka mætti bjór í landinu.  Það er bara ekki rétti tíminn núna þegar óvissan í okkar málum er svo mikil sem raun ber vitni.


mbl.is Icesave-umræðu lýkur í kvöld
Tilkynna um óviðeigandi tengingu við frétt

H R A P A

Samkvæmt fréttinni á Minnismerki Björgólfs að heita Harpa.  Þetta hlýtur að vera misskilningur.

Auðvitað meintu forkólfar Musterisins að það ætti að heita HRAPA !

Hér er að rísa minnismerki um það stutta tímabil Íslandsögunnar þegar þorri þjóðarinnar trúðu á álfasögur, rétt eins og jarðálfarnir í Þykkvabæjarkartöfluauglýsingunni hér um árið.

HRAPA SKAL ÞAÐ HEITA


mbl.is Harpa skal tónlistarhúsið heita
Tilkynna um óviðeigandi tengingu við frétt

Segir sitt um menningarstig þjóðar

Kanarnir halda áfram að fínslípa aðferðir við að drepa fólk.  Gasklefar, rafstuð, eitraðar lyfjagjafir og fleira hefur verið reynt. 

Ég hef aðeins eina skoðun á þessu öllu:  Dauðarefsing er siðleysi eða siðferðileg uppgjöf sem með engu móti er hægt að réttlæta í upplýstu menningarsamfélagi, sama hver málsatvik eru.  Þjóðir sem enn halda sig við þá frumstæðu villimennsku að taka fólk af lífi eftir opinberan dóm verðskulda ekki að teljast menningarþjóðir.  Þá gildir einu hvort það eru Bandaríkin, Rússland, Kína eða arabalöndin. Frumskylda hvers samfélags er að stuðla að velferð þegnanna, burtséð frá stöðu þeirra.  Vernda þá fyrir áföllum og slysum.  Enda er kostað miklu til að hindra slys og hamfarir og bjarga mannslífum ef svo ber undir. 

Ég vil ganga lengra, í tilefni af því að ýmis lönd eru nú að senda þúsundir manna í stríð í fjarlægum heimshluta.  Það er mannréttindabrot að skylda fólk til þess að bera vopn gegn öðru fólki, í nafni einhvers lands eða þjóðar.  Herskylda er mannréttindabrot.  Það breytist stöðugt í áranna rás hverjir eru fjendur og hverjir vinir í heimi hér.  Hinn "heilagi málstaður" sem eitt sinn var hafður sem átylla herkvaðningar er áður en varir orðinn úreltur, gleymdur - og jafnvel hlægilegur.

Ég man ekki eftir hverjum það var haft, en ég heyrði einu sinni tilvitnun sem ég man vel: 

"Ekkert land og engin þjóð er þess virði að fórna lífinu fyrir."


mbl.is Ný aðferð við aftökur í Bandaríkjunum
Tilkynna um óviðeigandi tengingu við frétt

Íslenskukunnátta blaðamanna Moggans

.. eða réttara sagt kunnáttuleysi.

Það er orðið hrein raun að opna vefsíðu Morgunblaðsins, því það má heita daglegt brauð að þar æpi á lesandann alls kyns málfarsambögur.  Vitanlega geta slæðst innsláttarvillur í hvaða texta sem er, ekki síst við fréttaskrif, þar sem hraðinn er mikill.  En hér er um eitthvað annað, meira og verra að ræða.

Eitt dæmi um misskilning eða kunnáttuleysi blaðamanns birtir Mogginn á netsíðu sinni í dag, en það er skemmtifrétt um "Aðhaldsnærföld fyrir bjórvömbina" !  Sé fréttin skoðuð nánar kemur í ljós að hún fjallar um einhvers konar lífstykki fyrir karlmenn, til að minna beri á bjórvömb og fitu á kroppnum.  "Nærfald" er orð sem ég hef aldrei séð né heyrt áður, en nærhald þekki ég. Ekki veit ég betur en að nærhald sé sú flík sem ég kalla brók, en á Suðvesturlandi gengur hún undir því teprulega nafni nærbuxur.  Aðhaldsnærhald væri því trúlega einhvers konar brók sem veitir aðhald.  Ef til vill til að þrýsta þjóhnöppunum saman eða til að halda að einhverju öðru sem brókin hylur.

Af fréttinni að dæma voru þessi "nærföld" ætluð til að halda bjórvömbinni inni, en fráleitt er að þetta plagg dugi til að leysa vandann, ef vömbinn er sigin ofan í brók.


Er til flugmannaafsláttur líka ?

Sumt af íslenskum skatta- og ívilnunarreglum er greinilega orðið gamalt dót, þó ekki sé meira sagt. Sjómenn hafa haft þennan sjómannaafslátt, að mér skilst, í meira en hálfa öld, svo ekki er furða þó þeir rísi gegn því að við honum sé hróflað.

Ég er hins vegar þeirrar skoðunar að mikið hafi breyst í aðbúnaði og kjörum sjómannastéttarinnar á hálfri öld og því hljóti að vera tímabært að endurskoða þessa ívilnun með sanngirni í huga.  Mér vitanlega hafa áhafnir flugvéla ekki sambærilegar ívilnanir í skattkerfinu, né t.d. starfsmenn Þróunarsamvinnustofnunar, sem dvelja stundum langdvölum fjarri fjölskyldu  og íslensku velferðarkerfi.  Einhvern veginn er komið til móts við þessa hópa í gegnum almenn kjör sem samið er um á vinnumarkaði.  Ég fæ ekki séð réttlætið í því að halda uppi þessum sjómannaafslætti.

Þeim fjármunum sem það sparar ríkinu að fella sjómannaafsláttinn niður væri vel varið til þess að hækka persónuafsláttinn sem því næmi.  Það kæmi þeim sem virkilega þurfa á að halda að mestum notum.


mbl.is Sjómenn vara stjórnvöld við
Tilkynna um óviðeigandi tengingu við frétt

Rússar banna dauðarefsingar...

.. og komast þar með nær samfélagi siðmenntaðra þjóða.  Eftir sitja stórveldin Kína og Bandaríkin, með þann smánarblett sem beiting dauðarefsingar er.

Annars er það undarlegt að lönd sem lengst eru komin á sviði mannúðar- og mannréttindamála skuli ekki beita áhrifum sínum í meira mæli en raun ber vitni til að útrýma villimennsku pyntinga, nauðgana og grimmilegra refsinga sem viðgangast í stórum hluta heimsins.  Mannréttindi eiga ekki að vera lúxus hinna fáu.

Það er eins og að víða sé litið á refsingar, sem menn eru dæmdir í, sem hefnd samfélagsins.  Hámark hefndarinnar er að svipta hinn brotlega lífi eða ræna hann sjálfsvirðingunni, heilsunni og jafnvel vitinu fyrir fullt og allt. Á Íslandi er talað um betrunarhús, betrunarvist o.s.frv.   Er það hugtak yfirleitt til í öðrum tungumálum, eða sá skilningur sem í orðunum felst ?


mbl.is Banna dauðarefsingar í Rússlandi
Tilkynna um óviðeigandi tengingu við frétt

Elsti íbúi landsins: Rebbi

Mér hefur lengi legið forvitni á að vita hversu mikið fer af opinberu fé í að styrkja sportveiði á villtum ref. Hætt er við að það samsvari ófáum tonnum af dilkakjöti og sekkjum af æðardún. Því hefur verið haldið fram að tjón bænda af rebba sé gífurlegt, þó engar tölur séu birtar um mat á því.  Og þegar rök bænda þrýtur fara þeir að tala um mófugla.  Ef mófuglavernd væri aðalmálið, þá ætti með sömu rökum að ríkisstyrkja sportveiðar á smyril, skúm og fálka.

Sannleikurinn er sá að bændur, hvar sem er í heiminum, standa í stríði við hverja þá skepnu sem hirðir eitthvað af bústofni þeirra.  Í öðrum löndum stendur stríðið við skógarbirni og úlfa, sama þó þessar tegundir séu í bráðri útrýmingarhættu sums staðar.

Það eru til tryggingafélög sem tryggja menn fyrir tjóni af ýmsum toga.  Því geta ekki bændur fengið sér tryggingar vegna meints tjóns af villtum dýrum ?  Ég er alveg handviss um að jafnvel þó iðgjöldin yrðu greidd af opinberu fé, yrði það snöggtum ódýrara en að borga bændum og öðrum styrki og verðlaun fyrir sportveiðar.  Væri þessi tilhögun tekin upp væri það tjónþolanna að sanna tjón sitt.

 


mbl.is Æðarræktendur vilja að ríkið greiði fyrir refaveiðar
Tilkynna um óviðeigandi tengingu við frétt

Fyndið - eða þannig

Eiginlega er það eina fyndna við þessa frétt fáfræði blaðamannsins sem skrifaði hana.  Japan er ævafornt keisaraveldi, en hér er þjóðhöfðingi landsins kallaður forseti !

Annars eru það almennir mannasiðir að sníða hegðun sinni að siðum gestgjafans, innan þeirra marka sem sem kunnátta og geta setja.


mbl.is Að hneigja sig eða hneigja sig ekki
Tilkynna um óviðeigandi tengingu við frétt

Samgönguframkvæmdir

Flest er þetta hið besta mál.  Það eina sem stingur í augu eru þessi margnefndu Vaðlaheiðargöng. Ég á erfitt með að koma auga á brýna þörf fyrir þessi jarðgöng.  Vegurinn um Víkurskarð er góður og vandaður vegur og jarðgöng sem stytta ekki nema 16 km leið sem að auki er næsta hættulítill geta ekki talist mikilvæg.

Það þarf hins vegar að ljúka gerð Hringvegarins.  Þar er hægt að stytta hringinn um rúma 60 kílómetra með því að byggja frambærilegan veg um Öxi, - hugsanlega að hluta til í jarðgöngum.  Sömuleiðis vantar jarðgöng undir Lónsheiði, stutt göng sem legðu af verulega hættulegan vegarkafla um Hvalnes- og Þvottárskriður.

Þá vil ég nefna ástandið í samgöngum Vopnafjarðar og byggðanna þar fyrir norðan:  Það er brýnt að gera jarðgöng milli Vopnafjarðar og Héraðs og þar með stytta leið milli þessarra nágrannabyggða um 80 km.

En umfram allt: Látum allar umræður um lúxusframkvæmdir í vegamálum bíða þangað allur Hringvegurinn er lagður bundnu slitlagi og þar til allir þéttbýlisstaðir landsins eru tengdir vönduðu vegakerfi, hvar sem þessir staðir eru.


mbl.is Samgönguframkvæmdir undirbúnar
Tilkynna um óviðeigandi tengingu við frétt

« Fyrri síða | Næsta síða »

Innskráning

Ath. Vinsamlegast kveikið á Javascript til að hefja innskráningu.

Hafðu samband